मंगळवार, १० मार्च, २००९

पंचनामा


भारती
निश्कालाजी पोलिसांत
भरती नवी झाली आहे.
नव्या पिढीची "झलक'इकडेही
दिसू लागली आहे.

तंटामुक्ती
वषार्नुवर्षे गावातील तंटे
"शांतते'त चालू असतात.
तंटामुक्तीच्या बैठकीत मात्र
बंदोबस्ताला पोलिस लागतात.

दारू आणि पाणी
दारू झाली स्वस्त,
पाणी महागडे आहे.
कुलपात नळकोंडाळे,
बिअर बार उघडे आहे.

ड्राय डे
पुढच्या दाराला कुलूप
मोकळी दारू वाहते,
गांधीजींची जयंतीही,
"लोळून' साजरी होते.

आंदोलन
आंदोलनाचेसुद्धा आता
"फिक्‍सिंग झालेले असते.
उपोषणाला बसण्यापूर्वीच
उठण्याची वेळ ठरलेली असते.

रोडरोमिओ
रोमिओ-ज्युलिअटची कहाणी
रोड-रोडवर आली आहे.
प्रत्येक गावातील सडक
रोडरोमिओंनी भरली आहे.

पत्रक पुढारी
लेखणी जपून ठेवा
बाजार फार झाला
पत्रक पुढाऱ्यांचा
सुळसुळाट फार झाला.

दादा
काम कमी; पण
प्रसिद्धी जादा.
बातमी नाही आली,
की गुरगुरतो दादा.

बॅंक
काल रात्री बॅंक
ढसाढसा रडत होती.
तिजोरीच्या काळजाची
चोरी होत होती.

बोगस डॉक्‍टर
लोकसंख्या नियंत्रणावर
उपाय उत्तम करावा
गावोगावी एक तरी
बोगस डॉक्‍टर पाठवावा

यमाचा पत्ता

तीर्थयात्रेचा संबंध आता
अंत्ययात्रेशीच जुळतो.
बेफाम वाहनचालकांना,
यमाचाच पत्ता मिळतो.

साडेसाती
भक्ताजवळ शनीदेव
ढसाढसा रडत होते.
साडेसाती सोडतो तुझी
लूटमार थांबव, म्हणत होते.

निवडणूक
लढवायची नसली
तरीलढायचे असते,
पोलिसांनाही निवडणुकीची
धास्ती लागलेली असते.

-भरत वेदपाठक
9922419242

1 टिप्पणी:

अनामित म्हणाले...

far chhan kavita ahet ya... va va avdlya aplayay.