मोबाईलच्या "चॉईस नंबर'चे "फॅड' "कॅश' करून पैसा मिळविण्याच्या लालसेने दोन तरुणांना गुन्हेगारी जगात ढकलले. दुसऱ्याच्या चॉईस नंबरचे कार्ड बनावट कागदपत्रांद्वारे मिळवून त्याची एक लाख रुपयांत विक्री करण्याचा त्यांचा प्रयत्न होता. मात्र, खरेदीदाराला संशय आल्यामुळे ते अडकले. आता दोघेही पोलिसांचा पाहुणचार घेत आहेत. प्रदीप गजानन राठोड (वय 23), अभय राजेश बन (वय 21, दोघेही, रा. सिंदखेडराजा बायपास रोड, जालना) अशी आरोपींची नावे आहेत. पोलिसांनी दिलेल्या माहितीनुसार, सिडको एन-तीन येथील रहिवासी प्रदीप प्रल्हाद राठोड यांनी मोबाईल कंपनीकडून चॉईस क्रमांकाचे प्रिपेड सिमकार्ड दहा हजार रुपये देऊन घेतले होते. त्यांच्याकडे दोन-तीन अन्य क्रमांकाचे सिमकार्ड आहेत. त्यामुळे ठराविक वेळी ते हे कार्ड वापरत होते; अन्यथा ते बंद राही. अभय बन मोबाईलचे रिचार्ज व्हाऊचर विकण्याचे काम करतो. या चॉईस क्रमांकावर त्याचा डोळा होता. त्याने कंपनीच्या गॅलरीतून सिमकार्ड मालकाचे नाव मिळविले. प्रदीप प्रल्हाद राठोड असे नाव कळताच त्याला औरंगाबाद येथे संगणकशास्त्र विषयाचे शिक्षण घेणारा त्याचा मित्र प्रदीप गजानन राठोड याची आठवण झाली. त्यानंतर त्यांनी हा नंबर मिळविण्याचा कट रचला. मूळ मालक अनेकदा हे सिमकार्ड बंद ठेवत असल्याचे त्यांना आढळून आले. त्यांनी प्रदीप याच्या वाहनचालक परवान्याची झेरॉक्‍स प्रत वापरून त्या सिमकार्डचे मालक आपणच असल्याचा बनाव करण्याचे ठरविले. त्यानुसार त्यांनी सिडको कॅनॉट प्लेस येथील एका गॅलरीत येऊन कागदपत्रे देऊन आमचे सिमकार्ड गहाळ झाले आहे. दुसरे देण्यात यावे, अशी मागणी केली. तेव्हा डीएसके कम्युनिकेशनमधून त्यांना या क्रमांकाचे दुसरे कार्ड देण्यात आले. नवे कार्ड हाती पडताच त्यांनी बदनापूर येथील एकास दूरध्वनी करून कार्ड मिळाल्याचे सांगितले. त्याने निराला बाजार येथील अफसर नावाच्या व्यक्तीला चॉईस क्रमांक एक लाख रुपयांमध्ये देण्याचा सौदा करून ठेवलेला होता. हे दोघे या क्रमांकाचे कार्ड घेऊन अफसर यांच्याकडे गेले, तेव्हा त्यांना हा क्रमांक ओळखीचा वाटला. त्यांनी चौकशी केल्यानंतर प्रदीप राठोड यांचे नाव कळाले. त्याचबरोबर प्रदीप राठोड यांचे बंधू प्रमोद राठोड यांच्याकडे यापूर्वी हा चॉईस क्रमांक देण्याची मागणीही त्यांनी केली होती. हे आठवताच त्यांनी प्रमोद राठोड यांच्याशी संपर्क साधून ""मी मागितला तर दिला नाही व दुसऱ्याला कशामुळे चॉईस नंबर विकला,'' अशी विचारणा केली. प्रमोद राठोड यांना काही समजेना. आपण नंबर विकला नसताना असे का घडत आहे, असा प्रश्‍न त्यांना पडला. त्यानंतर चौकशीत ही फसवाफसवी समोर आली. श्री. राठोड यांनी सिडको पोलिसांना या घटनेची माहिती दिल्यानंतर पोलिस उपनिरीक्षक बी. यू. बोडखे पाटील तातडीने घटनास्थळी आले. त्यांनी या दोघांना ताब्यात घेतले. त्यानंतर त्यांच्याविरुद्ध फसवणूक केल्याचा गुन्हा दाखल करून त्यांना अटक करण्यात आली.
कोणत्याही टिप्पण्‍या नाहीत:
टिप्पणी पोस्ट करा