चोरही लावतात सापळे!

चोराला पकडण्यासाठी पोलिस जसे सापळे लावतात, तसेच सापळे चोरही "सावज' पकडण्यासाठी लावतात. बॅंकांच्या बाहेर, दागिन्यांच्या दुकानाबाहेर, गर्दीच्या ठिकाणी, एवढेच नव्हे, तर तुमच्या घराच्या आसपासही चोरटे दबा धरून संधीची वाट पाहत बसलेले असतात. त्यांना ही संधी मिळू नये, यासाठी आपली आपणच दक्षता घेतलेली बरी!बॅंकेतून पैसे काढताना लोक घाईत असतात. याचा फायदा चोरटे उठवतात. बॅंकेच्या आसपास थांबून, पैसे घेऊन बाहेर पडणाऱ्यांवर ते लक्ष ठेवून असतात. त्यामुळे मोटारसायकलच्या डिकीत ठेवलेले पैसे लांबविणे, डोळ्यात मिरचीची पूड टाकून पैसे लांबविणे, खाली काही नोटा पडल्या आहेत, असे सांगून, अगर सुटे पैसे करण्याच्या बहाण्याने रोकड पळवून नेली जाते. रस्त्याने जाताना अंगावर घाण टाकून त्याकडे लक्ष वेधले जाते. ती साफ करीत असताना रोकड पळवून नेण्याचा चोरट्यांचा बेत असतो. त्यामुळे अशा परिस्थितीत सावधानता बाळगून जवळची रोकड असलेली बॅग सांभाळावी. सायंकाळी फिरण्यासाठी घराबाहेर पडणाऱ्या महिलांच्या गळ्यातील दागिने हिसकावण्यासाठी चोरटे घराच्या आसपासच दबा धरून बसलेले असतात. कधी "आम्हीच पोलिस आहोत,' असा बहाणा करून सुरक्षित ठेवण्याच्या बहाण्याने वृद्धांकडील ऐवज लांबविला जातो. घरी लग्न समारंभ असल्यास चोरांची नजर त्यावरही असते. गर्दीत घुसून लूट करणे, घरात कोणी नाही, हे पाहून घरफोडी करणे, असे गुन्हे घडतात. दागिन्यांना पॉलिश करून देण्याच्या बहाण्याने दागिने लांबविण्याच्या घटनाही घडतात. त्यामुळे महिलांनी अशा लोकांवर विश्‍वास ठेवू नये.स्वस्तात सोने देण्याचे आमिष दाखवून रानावनात नेऊन लूटमार करण्याच्या घटना तर जिल्ह्याच्या काही भागात नित्याच्या झाल्या आहेत. दागिने खरेदी करण्याच्या बहाण्याने सराफी दुकान लुटणे, ग्राहक म्हणून प्रवेश करायचा अन्‌ रोखपालास धाक दाखवून बॅंक लुटायची, रात्री पेट्रोल पंपावर पेट्रोल भरण्याच्या निमित्ताने येऊन लूटमार करण्याचेही प्रकार घडतात. वाहन भाड्याने ठरवून चोरून घेऊन जाणे, नोकर म्हणून कामावर येऊन नंतर चोरी करून पळून जाणे, अशा पद्धतीही चोरटे वापरतात.
सदासर्वदा सावधान
-बॅंकेतून मोठी रक्कम काढताना विश्‍वासू व्यक्तीस बरोबर घेऊन जावे.
-रोख रक्कम वाहनाच्या डिकीत ठेवू नये.
-पैसे काढल्यावर बॅंकेच्या आसपास कोठेही न थांबता सरळ निघून यावे.
-रस्त्यात पडलेली चिल्लर उचलण्याचा मोह टाळावा.
-आपल्या हातातील ऐवज कोणाही परक्‍या व्यक्तीच्या हाती देऊ नये.
-महिलांनी घराबाहेर पडताना दागिन्यांची काळजी घ्यावी.
-बॅंका, पतसंस्था, पेट्रोल पंप, व्यापारी पेढ्या यांनी सुरक्षिततेची काळजी घ्यावी.
-नोकर ठेवताना त्याची संपूर्ण चौकशी करावी.
-अडचणीच्या प्रसंगी तत्काळ पोलिसांशी संपर्क साधून त्यांना घटनेचा नेमका तपशील व चोरट्यांचे वर्णन सांगावे.